Злучаныя Штаты вядуць перамовы з Аляксандрам Лукашэнкам не столькі дзеля вызвалення палітвязняў, колькі для ўстанаўлення канала сувязі, праз які можна даносіць пазіцыю Вашынгтона да Уладзіміра Пуціна. Пра гэта заявіў спецпасланнік прэзідэнта ЗША па Украіне Кіт Келаг, адказваючы на пытанне журналіста «Люстэрка» на Варшаўскім форуме па бяспецы. Пры гэтым палітык пацвердзіў, што адміністрацыя Трампа ўсведамляе: Лукашэнка можа вызваліць аднаго, а потым «схапіць яшчэ дваіх».
Журналіст «Люстэрка» спытаў у генерала Келага, ці выгадная ЗША ўгода, у выніку якой беларускія ўлады вызваляюць нейкую колькасць палітвязняў, але потым арыштоўваюць нават большую колькасць людзей. Так, паводле інфармацыі беларускіх праваабаронцаў, пасля вызвалення пры пасярэдніцтве амерыканскага боку 52 чалавек у верасні агульная колькасць палітвязняў не толькі не зменшылася, але і вырасла: паводле звестак на 5 верасня іх налічваласяь 1198 чалавек, а на 26 верасня — ужо 1201.
— Думаю, мы ўсе ведаем, хто такі Лукашэнка, і разумеем ягоную тактыку ў Беларусі. Дазвольце мне прывесці невялікую перадгісторыю. Прэзідэнт Трамп падаў руку многім розным людзям, спрабуючы знайсці нейкае рашэнне ў гэтай вайне (Расіі з Украінай. — Заўв. рэд.). Мы хочам быць упэўненыя, што ў нас ёсць некалькі каналаў для ўзаемадзеяння, а не адзін. А Лукашэнка цяпер шмат камунікуе з прэзідэнтам Пуціным, — пачаў свой адказ Келаг.
Ён патлумачыў, што галоўная мэта візітаў яго намесніка Джона Коўла ў Мінск — пошук рашэнняў па вайне ва Украіне.
— Мы завязалі адносіны [ з Лукашэнкам], каб забяспечыць наяўнасць адкрытых каналаў сувязі. Гэта было трэба, каб усе нашыя пасланні даходзілі да прэзідэнта Пуціна. Вось чаму мы гэта зрабілі. Мы ад пачатку ехалі туды не дзеля вызвалення палітвязняў. <…> Галоўная мэта — знайсці найлепшае магчымае рашэнне для вайны паміж Украінай і Расіяй, — заявіў Келаг.
Пры гэтым прадстаўнік Белага дома даў зразумець, што амерыканскі бок цалкам усведамляе тактыку афіцыйнага Мінска.
— У нас у Амерыцы ёсць прымаўка, сэнс якой у тым, што мы «не ўчора нарадзіліся». Мы разумеем, што Лукашэнка вызваліць аднаго, а потым, імаверна, схопіць яшчэ дваіх. <…> Мы не наіўныя. Мы выдатна ведаем, што ён робіць. Ні на секунду не сумнявайцеся ў гэтым.
Аднак, паводле генерала, вызваленне людзей — важнае.
— У яго больш чым тысяча палітвязняў, і іх вызваленне — гэта станоўчы пабочны эфект ад таго, што адбываецца. Мы гэта разумеем. <…> Калі мы выцягнем хаця б аднаго — гэта ўжо перамога. Так што, з майго пункту гледжання, Джон Коўл заслугоўвае поўнай ухвалы за сваю працу, — сказаў на заканчэнне Кіт Келаг.
Нагадаем, у 2025 годзе адміністрацыя прэзідэнта ЗША Дональда Трампа актывізавала кантакты з афіцыйным Мінскам. Пасля візітаў амерыканскіх прадстаўнікоў у Мінск 21 чэрвеня на волю выйшлі 14 палітзняволеных, у тым ліску Сяргей Ціханоўскі. 11 верасня, пасля чарговага візіту прадстаўніка Трампа Джона Коўла ў Мінск, стала вядома пра вызваленне яшчэ 52 вязняў, якіх дэпартавалі ў Літву. Сярод іх быў і вядомы палітык Мікалай Статкевіч, які адмовіўся пакідаць краіну і якога, імаверна, вярнулі ў калонію.
Чытайце таксама
