Злучаныя Штаты знялі санкцыі з авіякампаніі «Белавія» ў першую чаргу з меркаванняў бяспекі палётаў, а таксама каб пазбавіць беларускія ўлады магчымасці выкарыстоўваць самалёты для «гнюсных мэтаў». Пра гэта на Варшаўскім форуме па бяспецы заявіў спецпрадстаўнік прэзідэнта ЗША Кіт Келаг.
Генералу задалі пытанне пра прычыны зняцця санкцый з беларускага нацыянальнага авіяперавозчыка, на што ён адказаў, што гэтае рашэнне «даволі простае».
— Гаворка ідзе пра авіякампанію, якая ў асноўным лётае на «Боінгах» ці «Эйрбасах». Яны аддаюць перавагу таму, каб іх самалёты не падалі з неба, — заявіў Келаг.
Паводле яго, Вашынгтон даў зразумець афіцыйнаму Мінску, што гатовы пайсці на саступкі, каб гарантаваць бяспеку палётаў, але выставіў сустрэчныя ўмовы.
— Наш каментар у іх адрас быў такім: «Прывядзіце ў парадак сваю авіякампанію, каб вы маглі лётаць на сваіх самалётах з запчасткамі «Боінга», і мы здымем гэтую санкцыю, гэтую яе частку. Але вы не мусіце выкарыстоўваць іх у гнюсных мэтах, — падкрэсліў прадстаўнік Трампа.
У якасці прыкладу «гнюсных мэтаў» Келаг прывёў перавозку мігрантаў у Беларусь для наступнай нелегальнай перапраўкі іх праз мяжу ў ЕС, што, з ягоных словаў, «часам адбываецца».
— Гэта нашае патрабаванне як бы кажа: «Добра, мы бачым, што адбываецца, не лічыце нас дурнямі», — дадаў генерал.
Нагадаем, 11 верасня прадстаўнік прэзідэнта ЗША Джон Коўл на сустрэчы з Аляксандрам Лукашэнкам абвясціў пра зняцце санкцый з «Белавіі». Пазней Бюро прамысловасці і бяспекі Мінгандлю ЗША ўдакладніла, што абмежаванні знятыя з васьмі самалётаў Boeing, якія цяпер могуць выконваць міжнародныя рэйсы і праходзіць тэхабслугоўванне з выкарыстаннем амерыканскіх запчастак.